Madanapalle: మదనపల్లె మండలం పొన్నూటిపాళెం గ్రామ పరిధిలోని సర్వే నంబర్లు 42-2, 43-2, 45, 49లలో ఉన్న 22.89 ఎకరాల పిత్రార్జిత భూమికి సంబంధించి తమకు 1బి, అడంగల్, పట్టాదారు పాస్ పుస్తకాలు మంజూరు చేయాలని బాధిత రైతులు సబ్ కలెక్టర్, జాయింట్ కలెక్టర్‌ను కోరారు. ఈ భూమికి సంబంధించి సుమారు 90 మంది రైతు కుటుంబాలు తరతరాలుగా అనుభవంలో ఉన్నాయని, రెవెన్యూ రికార్డుల్లో కూడా యజమానుల పేర్లు నమోదై ఉన్నాయని తెలిపారు. ఈ భూమి డీకేటీ లేదా ప్రభుత్వ భూమి కాదని స్పష్టం చేశారు.

రైతుల కథనం ప్రకారం, మొత్తం 90 మంది భాగస్తుల్లో ఎన్‌ఆర్‌ఐ చలపతి నాయుడుకు 2.83 ఎకరాల భూమి ఉంది. గతంలో కోర్టు ప్రిలిమినరీ డిక్రీ, కమిషనర్ నివేదిక ఆధారంగా ఆయన భూమికి హద్దులు నిర్ణయించి వేరుచేసినట్లు తెలిపారు. అయినప్పటికీ, 89 మంది భాగస్తులు ఒకే అభిప్రాయంతో సబ్ కలెక్టర్ ఎదుట రాతపూర్వకంగా ప్రకటన ఇచ్చినా, చలపతి నాయుడు అభ్యంతరాలు తెలుపుతూ తమకు పాస్ పుస్తకాలు రాకుండా అడ్డుకుంటున్నారని ఆరోపించారు. తమకు 1బి జారీ చేయకూడదని కోర్టు నుంచి ఎలాంటి ఇంజంక్షన్ లేదా స్టేటస్ కో ఉత్తర్వులు లేవని రైతులు పేర్కొన్నారు.

పొన్నూటిపాళెం గ్రామంలో రీ-సర్వే పూర్తయినప్పటికీ వెబ్‌ల్యాండ్-2లో పోర్టింగ్ ప్రక్రియ ఇంకా పూర్తి కాలేదని, అనేక సాంకేతిక లోపాలు ఉన్నందున ఆలస్యం జరుగుతోందని తెలిపారు. ఈ నేపథ్యంలో ముందుగా వెబ్‌ల్యాండ్-1 ద్వారా సర్వే నంబర్ల ప్రాతిపదికన 1బి, అడంగల్ మంజూరు చేసి, అనంతరం వెబ్‌ల్యాండ్-2కు మార్పు చేయాలని కోరారు. రెవెన్యూ అధికారులు ఇందుకు అంగీకరించి ప్రక్రియ ప్రారంభించినప్పటికీ, అడిషన్ ఎనేబుల్ ప్రక్రియ సబ్ కలెక్టర్ లాగిన్‌లోనే నిలిచిపోయిందని రైతులు తెలిపారు.