మేడ్చల్ మల్కాజ్గిరి జిల్లా  : రాబోయే హనుమాన్ జయంతి శోభాయాత్రలను ప్రశాంతంగా, సజావుగా నిర్వహించేందుకు ఆల్వాల్ పోలీస్ స్టేషన్ లో శాంతి కమిటీ సమావేశాన్ని ఎస్‌హెచ్‌ఓ ప్రశాంత్ ఆధ్వర్యంలో నిర్వహించారు. ఈ సమావేశానికి వివిధ మతాల ప్రతినిధులు, శోభాయాత్ర నిర్వాహకులు, స్థానిక పెద్దలు హాజరయ్యారు.

సమావేశంలో శోభాయాత్రల రూట్ మ్యాప్, భద్రతా ఏర్పాట్లు, చట్టం-శాంతి పరిరక్షణ, అనుమతించిన సమయాల పాటింపు, శబ్ద నియంత్రణ నిబంధనలు, పోలీసులతో సమన్వయం వంటి కీలక అంశాలపై చర్చించారు.

ఈ సందర్భంగా ఎస్‌హెచ్‌ఓ ప్రశాంత్ మాట్లాడుతూ... హనుమాన్ జయంతి శోభాయాత్రలు ప్రతి సంవత్సరం భక్తిశ్రద్ధలతో జరుపుకునే ముఖ్యమైన వేడుకలని, ఈ వేడుకలు శాంతియుతంగా, ఎటువంటి అవాంఛనీయ సంఘటనలు లేకుండా జరగడం అందరి బాధ్యత అని పేర్కొన్నారు. నిర్వాహకులు ముందుగా నిర్ణయించిన మార్గాలనే అనుసరించాలని, అనుమతించిన సమయాలను కచ్చితంగా పాటించాలని సూచించారు. అధిక శబ్దంతో ప్రజలకు ఇబ్బంది కలగకుండా సౌండ్ సిస్టమ్ వినియోగంపై జాగ్రత్తలు తీసుకోవాలని తెలిపారు.

అలాగే, ర్యాలీల సమయంలో యువత భావోద్వేగాలకు లోనుకాకుండా శాంతంగా వ్యవహరించాలని, ఎలాంటి వివాదాస్పద చర్యలకు దూరంగా ఉండాలని హెచ్చరించారు. ఏదైనా అనుమానాస్పద పరిస్థితులు కనిపించిన వెంటనే పోలీసులకు సమాచారం ఇవ్వాలని కోరారు. శాంతి భద్రతల పరిరక్షణలో ప్రజల సహకారం ఎంతో ముఖ్యమని, పోలీసులతో సమన్వయం కొనసాగిస్తే వేడుకలు విజయవంతంగా పూర్తవుతాయని ఆయన తెలిపారు.

ఈ సందర్భంగా పాల్గొన్న ప్రతినిధులు హనుమాన్ జయంతి వేడుకలను శాంతియుతంగా నిర్వహించేందుకు పోలీసులకు పూర్తి సహకారం అందిస్తామని హామీ ఇచ్చారు.

#sidhumaroju

Alwal.