జగిత్యాల జిల్లా రాజకీయాల్లో భారీ మార్పులకు దారితీసే పరిణామాలు చోటు చేసుకుంటున్నాయి. దశాబ్దాలుగా కాంగ్రెస్ పార్టీలో కీలక నాయకుడిగా కొనసాగిన మాజీ మంత్రి, సీనియర్ నేత టీ. జీవన్ రెడ్డి రాజకీయ ప్రయాణం కొత్త మలుపు తిరగబోతుందనే చర్చలు తీవ్రంగా సాగుతున్నాయి. వచ్చే మార్చి 25న బీఆర్ఎస్ అధినేత కె. చంద్రశేఖర్ రావు సమక్షంలో జీవన్ రెడ్డి గులాబీ కండువా కప్పుకునే అవకాశముందని రాజకీయ వర్గాల్లో బలంగా వినిపిస్తోంది.ఈ వార్త ఒక్కటే జగిత్యాల రాజకీయాల్లో పెద్ద ప్రకంపనలు సృష్టిస్తోంది. గత అసెంబ్లీ ఎన్నికల తర్వాత జరిగిన పరిణామాలు, ముఖ్యంగా ఎమ్మెల్యే డా. సంజయ్ కుమార్ పార్టీ మార్పు, కాంగ్రెస్‌లో ఏర్పడిన అంతర్గత విభేదాలు… ఇవన్నీ ఇప్పుడు జీవన్ రెడ్డి నిర్ణయానికి కారణాలుగా చర్చకు వస్తున్నాయి,  

‎2023 అసెంబ్లీ ఎన్నికల్లో జగిత్యాల నుంచి బీఆర్ఎస్ అభ్యర్థిగా గెలిచిన ఎమ్మెల్యే డా. సంజయ్ కుమార్ తరువాత కాంగ్రెస్ పార్టీలో చేరడం స్థానిక రాజకీయాల్లో పెద్ద సంచలనంగా మారింది. ఈ పరిణామం కాంగ్రెస్‌లో అంతర్గత సమీకరణాలను పూర్తిగా మార్చేసింది. జగిత్యాలలో ఇప్పటికే బలమైన స్థాయిలో ఉన్న మాజీ మంత్రి టీ. జీవన్ రెడ్డి వర్గానికి ఇది పెద్ద దెబ్బగా మారింది. సంజయ్ కుమార్ కాంగ్రెస్‌లో చేరిన తర్వాత పార్టీ అధిష్టానం అతనికి ఎక్కువ ప్రాధాన్యత ఇవ్వడం జీవన్ రెడ్డి వర్గంలో తీవ్ర అసంతృప్తిని కలిగించింది. టిక్కెట్లు, స్థానిక సంస్థల పదవులు, పార్టీ కార్యక్రమాల్లో ప్రాధాన్యత… అన్నింటిలోనూ సంజయ్ కుమార్ వర్గానికే ఆధిక్యం లభించిందనే భావన జీవన్ రెడ్డి అనుచరుల్లో బలంగా వ్యక్తమైంది. ఇది క్రమంగా రాజకీయ విభేదాలకు దారి తీసింది.

‎మున్సిపల్ ఎన్నికలు… అసంతృప్తికి చివరి అంకం

ఇటీవల జరిగిన మున్సిపల్ ఎన్నికలు ఈ అసంతృప్తిని మరింత బహిర్గతం చేశాయి. జగిత్యాల మున్సిపల్ కౌన్సిల్‌లో టిక్కెట్ల కేటాయింపులో సంజయ్ కుమార్ వర్గానికి అత్యధిక ప్రాధాన్యత లభించింది. ఇదే కాకుండా చైర్‌పర్సన్ పదవి కూడా సంజయ్ కుమార్ వర్గానికి వెళ్లడం జీవన్ రెడ్డి వర్గంలో తీవ్ర ఆవేదనకు కారణమైంది. పార్టీకి నాలుగు దశాబ్దాలుగా సేవలు అందించిన నేతకు ఇలాంటి పరిస్థితి ఎదురవడం అనుచరులను కలచివేసింది.

‎ఈ పరిణామాల నేపథ్యంలో జీవన్ రెడ్డి పలుమార్లు పార్టీ హైకమాండ్ దృష్టికి సమస్యలను తీసుకెళ్లినట్లు సమాచారం. అయితే సమస్యకు సరైన పరిష్కారం లభించకపోవడంతో ఆయన తన రాజకీయ భవిష్యత్‌పై పునరాలోచన ప్రారంభించినట్లు తెలుస్తోంది.

‎

‎బీఆర్ఎస్‌తో చర్చలు… గులాబీ కండువా సంకేతాలు

‎

‎రాజకీయ వర్గాల్లో వస్తున్న సమాచారం ప్రకారం జీవన్ రెడ్డి ఇప్పటికే బీఆర్ఎస్ నాయకత్వంతో సంప్రదింపులు జరిపినట్లు ప్రచారం జరుగుతోంది. ముఖ్యంగా బీఆర్ఎస్ వర్కింగ్ ప్రెసిడెంట్ కేటీఆర్‌తో ఆయన చర్చలు జరిపినట్లు వార్తలు వినిపిస్తున్నాయి. హైదరాబాద్‌లో జరిగిన ఈ సమావేశాలు తరువాత ఎర్రవెల్లి ఫామ్‌హౌస్‌లో కూడా చర్చలు జరిగాయని రాజకీయ వర్గాలు చెబుతున్నాయి. ఈ చర్చల అనంతరం జీవన్ రెడ్డి బీఆర్ఎస్‌లో చేరికకు సానుకూలంగా స్పందించినట్లు సమాచారం. వచ్చే మార్చి 25న జగిత్యాల పట్టణంలోని బండారి గార్డెన్ ఫంక్షన్ హాల్‌లో భారీ సభ ఏర్పాటు చేసి, కేసీఆర్ సమక్షంలో జీవన్ రెడ్డి చేరిక జరగనున్నట్లు స్థానిక నాయకులు చెబుతున్నారు.

‎

‎సోషల్ మీడియాలో స్పష్టమైన సంకేతాలు

‎

‎జీవన్ రెడ్డి అనుచరులు ఇప్పటికే సోషల్ మీడియాలో తమ ప్రొఫైల్ చిత్రాలను మార్చడం, గులాబీ రంగు పోస్టర్లు పెట్టడం వంటి చర్యలు ప్రారంభించారు. ఇది పార్టీ మార్పుకు స్పష్టమైన సంకేతంగా రాజకీయ వర్గాలు భావిస్తున్నాయి. ముఖ్యంగా యువ కార్యకర్తలు బీఆర్ఎస్ జెండాలు, గులాబీ కండువాలతో ప్రచారం ప్రారంభించడంతో ఈ వార్తకు మరింత బలం చేకూరుతోంది.

‎

‎న్యూస్ ఛానల్స్‌లో కూడా ఇదే చర్చ 

‎

‎ఈ పరిణామం ఇప్పటికే పలు టెలివిజన్ ఛానల్స్ మరియు యూట్యూబ్ మీడియాల్లో ప్రధాన చర్చగా మారింది. పలు తెలుగు టీవీ చానల్స్ ఇటీవల ప్రసారం చేసిన బ్రేకింగ్ న్యూస్‌లో జీవన్ రెడ్డి బీఆర్ఎస్‌లో చేరే అవకాశాలు ఉన్నట్లు పేర్కొంది. కొన్ని వీడియోల్లో “కేసీఆర్ హామీతో జీవన్ రెడ్డి గులాబీ కండువా కప్పుకోబోతున్నారు” అనే వ్యాఖ్యలు కూడా వినిపిస్తున్నాయి.

‎

‎నాలుగు దశాబ్దాల కాంగ్రెస్ ప్రయాణం

‎

‎టీ. జీవన్ రెడ్డి తెలంగాణ రాజకీయాల్లో అనుభవజ్ఞుడైన నాయకుడు. నాలుగు దశాబ్దాలకు పైగా కాంగ్రెస్ పార్టీలో కొనసాగుతూ జిల్లా రాజకీయాల్లో బలమైన నాయకుడిగా ఎదిగారు.

‎వైఎస్ రాజశేఖర్ రెడ్డి ముఖ్యమంత్రిగా ఉన్న సమయంలో ఆయన మంత్రిగా బాధ్యతలు నిర్వహించారు. గ్రామీణ స్థాయిలో బలమైన క్యాడర్, వ్యక్తిగత అనుబంధం, ప్రజలతో నేరుగా మమేకమయ్యే శైలి… ఇవన్నీ ఆయనకు ప్రత్యేక గుర్తింపును తీసుకొచ్చాయి.

‎జగిత్యాల నియోజకవర్గంలో ఆయనకు ఇప్పటికీ బలమైన రాజకీయ ఆధారం ఉంది.

‎

‎బీఆర్ఎస్‌కు కొత్త బలం?

‎

‎జీవన్ రెడ్డి నిజంగా బీఆర్ఎస్‌లో చేరితే ఉత్తర తెలంగాణలో ఆ పార్టీకి కొత్త బలం లభించే అవకాశం ఉంది. జగిత్యాల, కోరుట్ల, ధర్మపురి వంటి ప్రాంతాల్లో ఆయనకు ఉన్న రాజకీయ ప్రభావం బీఆర్ఎస్‌కు అనుకూలంగా మారవచ్చని విశ్లేషకులు భావిస్తున్నారు. ప్రత్యేకంగా కాంగ్రెస్‌లో ఉన్న అసంతృప్తి నాయకులు కూడా ఈ పరిణామం తర్వాత తమ భవిష్యత్‌పై ఆలోచించే అవకాశముందని రాజకీయ పరిశీలకులు అంటున్నారు.

‎

‎కాంగ్రెస్‌కు పెద్ద ఎదురుదెబ్బ?

‎

‎మరోవైపు ఈ పరిణామం కాంగ్రెస్ పార్టీకి పెద్ద ఎదురుదెబ్బగా మారవచ్చు. ముఖ్యంగా ఇటీవల జరిగిన మున్సిపల్ ఎన్నికల తర్వాత అసంతృప్తి బహిర్గతం కావడం పార్టీ అంతర్గత పరిస్థితులను ప్రశ్నార్థకంగా మారుస్తోంది. పార్టీలో సీనియర్ నాయకుల అసంతృప్తి పెరుగుతున్న సంకేతాలు కనిపిస్తున్నాయి. ఈ పరిస్థితి కొనసాగితే భవిష్యత్‌లో మరిన్ని రాజకీయ మార్పులు చోటు చేసుకునే అవకాశం ఉందని విశ్లేషకులు భావిస్తున్నా రు

‎తెలంగాణ రాజకీయాల్లో గత కొన్నేళ్లుగా పార్టీ మార్పులు, ఫిరాయింపులు, అసంతృప్తి రాజకీయాలు ఎక్కువగా కనిపిస్తున్నాయి. ఈ నేపథ్యంలో జీవన్ రెడ్డి నిర్ణయం మరో కీలక మలుపుగా మారవచ్చు. ముఖ్యంగా కేసీఆర్ సమక్షంలో జరిగే ఈ చేరిక భారీ రాజకీయ సందేశాన్ని పంపే అవకాశం ఉంది.

‎జగిత్యాల నుంచి ప్రారంభమయ్యే ఈ రాజకీయ పరిణామం తెలంగాణ వ్యాప్తంగా ప్రభావం చూపుతుందా అనే ప్రశ్నకు సమాధానం వచ్చే రోజుల్లో తెలుస్తుంది. మార్చి 25న జగిత్యాలలో జరిగే సభ ఇప్పుడు అందరి దృష్టిని ఆకర్షిస్తోంది. కేసీఆర్ హాజరైతే ఈ చేరిక మరింత భారీగా జరిగి రాష్ట్ర రాజకీయాల్లో కొత్త చర్చకు దారితీయడం ఖాయం. తెలంగాణ రాజకీయ రంగస్థలం మరోసారి ‘గులాబీ’ రంగులో మునిగిపోతుందా? లేక ఇది కేవలం రాజకీయ ప్రచారమేనా? అన్న ప్రశ్నలకు సమాధానం రాబోయే రోజుల్లో వెల్లడి కానుంది.

‎