దుబాయ్‌లో అన్ని విమానాశ్రయాలు మూసివేత

ప్రయాణికులు ఎయిర్‌పోర్ట్‌కు రావొద్దని సూచనలు

ఇరాన్–ఇజ్రాయెల్ యుద్ధం తీవ్రరూపం దాల్చడంతో Dubaiలోని అన్ని విమానాశ్రయాలు తాత్కాలికంగా మూసివేసినట్లు అధికారులు ప్రకటించారు. భద్రతా కారణాల వల్ల విమాన రాకపోకలను నిలిపివేసి, ప్రయాణికులు ఎయిర్‌పోర్ట్‌లకు రావొద్దని సూచించారు.

దుబాయ్‌ మీదుగా ఇతర దేశాలకు వెళ్లే అనేక అంతర్జాతీయ విమానాలపై ప్రభావం పడింది. ట్రాన్సిట్ హబ్‌గా ఉన్న దుబాయ్‌ మూసివేతతో యూరప్‌, అమెరికా, ఆసియా దేశాలకు వెళ్లే సర్వీసులు రద్దు లేదా మళ్లింపు మార్గాల్లో నడుస్తున్నాయి.

భారత్‌ ఎయిర్‌పోర్టులపై ప్రభావం

దుబాయ్‌కు పెద్ద సంఖ్యలో సర్వీసులు నిర్వహిస్తున్న భారత విమానాశ్రయాలపై కూడా ప్రభావం కనిపిస్తోంది. ముఖ్యంగా Indira Gandhi International Airportలో ప్రయాణికులు పడిగాపులు కాస్తున్నారు. అనేక విమానాలు ఆలస్యం కావడంతో టెర్మినల్స్‌లో రద్దీ పెరిగింది.

ప్రయాణికులకు ఢిల్లీ ఎయిర్‌పోర్టు సూచనలు

ఢిల్లీ ఎయిర్‌పోర్టు అధికారులు కీలక సూచనలు జారీ చేశారు. విమాన ప్రయాణాలకు అంతరాయం ఏర్పడే అవకాశం ఉన్నందున, ప్రయాణికులు విమానాశ్రయానికి బయలుదేరే ముందు సంబంధిత విమానయాన సంస్థలను సంప్రదించాలని సూచించారు. తమ విమాన స్థితి, రీషెడ్యూల్ లేదా రద్దు వివరాలను అధికారిక వెబ్‌సైట్ లేదా కస్టమర్ కేర్ ద్వారా తెలుసుకోవాలని కోరారు.

ప్రస్తుత పరిస్థితుల్లో అనవసర ప్రయాణాలను వాయిదా వేసుకోవడం మంచిదని అధికారులు సూచిస్తున్నారు.