భర్త బలవంతపు మతమార్పిడి.. కాకినాడ ఎస్పీ ఆఫీస్ వద్దే తిరిగి హిందూ మతంలోకి వచ్చిన భార్య.
ప్రేమ పేరుతో తనను మోసం చేసి, బలవంతంగా ఇస్లాం మతంలోకి మార్చి, తన భర్త తీవ్ర వేధింపులకు గురిచేశాడని ఓ మహిళ కన్నీటిపర్యంతమై ఆవేదన వ్యక్తం చేసింది. తనకు న్యాయం చేయాలని కోరుతూ ఆమె కాకినాడ జిల్లా ఎస్పీ కార్యాలయంలో ఫిర్యాదు చేశారు. ఎస్పీ కార్యాలయ ఆవరణలోనే ఆమె తన తల్లితో బొట్టు పెట్టించుకుని, తిరిగి హిందూ మతంలోకి వస్తున్నట్లు ప్రకటించడం కలకలం సృష్టించింది.
వివరాల్లోకి వెళితే.. కాకినాడ జగన్నాథపురానికి చెందిన సిరివూరి బాలరమ్య, డిగ్రీ చదువుతున్న రోజుల్లో మటన్ షాపు నడిపే గౌస్ మొహిద్దీన్‌తో ప్రేమలో పడింది. సుమారు ఎనిమిదేళ్ల క్రితం తల్లిదండ్రులను ఎదిరించి ఆమె అతడిని వివాహం చేసుకుంది. అయితే, వివాహమైన రెండు నెలలకే వేధింపులు ప్రారంభమయ్యాయని, తనను బలవంతంగా ఇస్లాంలోకి మతమార్పిడి చేసి షేక్ ఉమల్ ఖైర్‌గా పేరు మార్చాడని ఆమె వాపోయింది.
తమకు కుమార్తె జన్మించిన తర్వాత వేధింపులు మితిమీరాయని, తన సమక్షంలోనే మరో ఐదారుగురు హిందూ యువతులతో సహజీవనం చేస్తూ, వారిని కూడా మతం మార్చాడని ఆమె ఆరోపించారు. దీనిపై నిలదీస్తే.. తనకు ఏడుగురిని వివాహం చేసుకునే అధికారం ఉందని చెబుతూ, కత్తులతో బెదిరించి దాడి చేసేవాడని ఆమె ఆవేదన వ్యక్తం చేశారు. అంతేకాకుండా, తన తల్లిదండ్రులకు ఫోన్ చేసి తన సోదరిని కూడా వేధిస్తానని అతడు బెదిరింపులకు పాల్పడినట్లు ఆమె పేర్కొన్నారు.
