● పల్లవి స్కూల్‌లో ట్రాఫిక్ నిబంధనలపై అవగాహన

● మైనర్లు వాహనాలు నడపవద్దని సూచించిన పోలీసులు

● రహదారి భద్రతపై విద్యార్థులకు అవగాహన కల్పించిన అధికారులు

మేడ్చల్ మల్కాజిగిరి , ఆగస్టు 19: మల్కాజిగిరి పోలీస్ కమిషనరేట్ పరిధిలోని బోయిన్‌పల్లిలో ‘అరైవ్ అలైవ్’ కార్యక్రమంలో భాగంగా విద్యార్థులకు ట్రాఫిక్ నిబంధనలు, రహదారి భద్రతపై అవగాహన కార్యక్రమం నిర్వహించారు. మల్కాజిగిరి పోలీస్ కమిషనర్ బి. సుమతి, ఐపీఎస్ ఆదేశాల మేరకు, ట్రాఫిక్-I డిప్యూటీ కమిషనర్ ఆఫ్ పోలీస్ కె. రాహుల్ రెడ్డి, ఐపీఎస్ పర్యవేక్షణలో తిరుమలగిరి ట్రాఫిక్ పోలీస్ స్టేషన్ ఆధ్వర్యంలో పల్లవి స్కూల్‌లో ఈ కార్యక్రమం జరిగింది.

ఈ సందర్భంగా విద్యార్థులకు అతివేగం, మద్యం సేవించి వాహనాలు నడపడం, మైనర్లు వాహనాలు నడపడం, ట్రిపుల్ రైడింగ్, నిర్లక్ష్యంగా లేదా ప్రమాదకరంగా డ్రైవింగ్ చేయడం, వాహనం నడుపుతూ మొబైల్ ఫోన్ వినియోగించడం వంటి చర్యల వల్ల జరిగే ప్రమాదాలు, వాటి దుష్పరిణామాలపై అధికారులు అవగాహన కల్పించారు.

హెల్మెట్, సీట్‌బెల్ట్ తప్పనిసరిగా ధరించడం, లేన్ క్రమశిక్షణ పాటించడం, ట్రాఫిక్ సిగ్నళ్లను గౌరవించడం, నిర్ణీత వేగ పరిమితులను పాటించడం, జీబ్రా క్రాసింగ్ వద్ద పాదచారులకు ప్రాధాన్యత ఇవ్వడం వంటి నిబంధనలను వివరించారు. ప్రతి ఒక్కరూ ట్రాఫిక్ నిబంధనలను పాటించడం ద్వారా రహదారి ప్రమాదాలను గణనీయంగా తగ్గించవచ్చని తెలిపారు.

మైనర్లు చట్టబద్ధమైన వయస్సు పూర్తికాకుండా, చెల్లుబాటు అయ్యే డ్రైవింగ్ లైసెన్స్ లేకుండా మోటారు వాహనాలు నడపరాదని అధికారులు స్పష్టం చేశారు. నిబంధనలు ఉల్లంఘిస్తే చట్టపరమైన చర్యలు ఎదుర్కోవాల్సి ఉంటుందని హెచ్చరించారు.

ఈ సందర్భంగా విద్యార్థులు ఉత్సాహంగా పాల్గొని ట్రాఫిక్ నిబంధనలు, రహదారి భద్రతకు సంబంధించిన పలు సందేహాలను అధికారులను అడిగి నివృత్తి చేసుకున్నారు. తాము నిబంధనలు పాటించడంతో పాటు తల్లిదండ్రులు, బంధువులు, స్నేహితులు కూడా ట్రాఫిక్ నియమాలను పాటించేలా ప్రోత్సహించాలని అధికారులు సూచించారు.

కార్యక్రమంలో తిరుమలగిరి డివిజన్ ట్రాఫిక్ అసిస్టెంట్ కమిషనర్ ఆఫ్ పోలీస్ జి. శంకర్ రాజు, పాఠశాల ప్రిన్సిపాల్, యాజమాన్యం, ఉపాధ్యాయులు, సిబ్బంది, విద్యార్థులు పాల్గొన్నారు. కార్యక్రమానికి విద్యార్థులు, ఉపాధ్యాయులు, పాఠశాల యాజమాన్యం నుంచి విశేష స్పందన లభించింది.

#sidhumaroju

Alwal