*ప్రెస్ నోట్*

*తేదీ: 23-04-2026*  

*విషయం: వైజాగ్ కార్పొరేషన్‌లో నడకపై పన్ను విధించడం కూటమి ప్రభుత్వ దుర్మార్గపు చర్య... ఈ విధానాలను తీవ్రంగా ఖండిస్తున్నాం...నలుకుర్తి రమేష్.*

*విశాఖపట్నం మున్సిపల్ కార్పొరేషన్ పరిధిలోని శివాజీ పార్క్, టెన్నేటి పార్క్, ఉడా పార్క్, సెంట్రల్ పార్క్* లాంటి ప్రధాన పార్కుల్లో ఉదయం, సాయంత్రం ప్రజారోగ్యం కోసం నడిచే సామాన్య ప్రజలపై ఏడాదికి ₹720 "నడక పన్ను" విధించాలని కూటమి ప్రభుత్వం తీసుకున్న నిర్ణయం అత్యంత హాస్యాస్పదం, అప్రజాస్వామికం, దుర్మార్గం. ఈ చర్యను మేము తీవ్రంగా ఖండిస్తున్నాము.

*ప్రజల ఆరోగ్యంపై పన్నా?*  

డాక్టర్లు, ప్రభుత్వమే "రోజూ నడవండి, ఆరోగ్యంగా ఉండండి" అని ప్రచారం చేస్తుంటే, అదే ప్రభుత్వం ఇప్పుడు ఈ లాంటి చోట్ల నడకపై పన్ను వేయడం దారుణం. షుగర్, బీపీ, గుండె జబ్బులు రాకుండా ఉండేందుకు పేద, మధ్యతరగతి ప్రజలు ఉచితంగా దొరికే పార్కుల్లో నడుస్తుంటే, వారి జేబులకు చిల్లు పెట్టడం ఎంతవరకు న్యాయం? 

*ఇది ప్రభుత్వ దివాళాకోరుతనానికి నిదర్శనం*  

ఎన్నికల ముందు సంక్షేమ పథకాల పేరుతో హామీల వర్షం కురిపించి, అధికారంలోకి వచ్చాక ఖజానా ఖాళీ అయ్యిందని సాకు చూపి, చివరికి ప్రజల నడకపై కూడా పన్ను వేసే దుస్థితికి ఈ కూటమి ప్రభుత్వం దిగజారింది. ఇది పాలనా వైఫల్యానికి, ఆర్థిక అసమర్థతకు ప్రత్యక్ష నిదర్శనం. 

*రేపు గాలికి కూడా పన్నేస్తారా?*  

ఈరోజు పార్కులలో నడకకు పన్ను వేసినవారు, రేపు పీల్చే గాలికి, తాగే నీటికి, చివరికి బతికేందుకు కూడా పన్ను వేసినా ఆశ్చర్యపోనవసరం లేదు. ప్రజలు ఏరి కోరి కూటమి ప్రభుత్వాన్ని గెలిపిస్తే, వారి నెత్తిన పన్నుల భారం మోపడం ద్రోహం చేయడమే.

*మా డిమాండ్లు:*  

1. విశాఖ కార్పొరేషన్ వెంటనే ఈ "నడక పన్ను" జీవోను ఉపసంహరించుకోవాలి.  

2. ప్రజారోగ్యాన్ని ప్రోత్సహించే బదులు, దానిపై పన్నులు వేసే విధానాలకు స్వస్తి పలకాలి.  

3. ఈ నిర్ణయం వెనుక ఉన్న అధికారులపై చర్యలు తీసుకోవాలి.  

 ఈ ప్రజావ్యతిరేక నిర్ణయాన్ని తక్షణమే వెనక్కి తీసుకోవాలని కూటమి ప్రభుత్వాన్ని డిమాండ్ చేస్తున్నాము. 

*ఇట్లు*  

*నలుకుర్తి రమేష్*  

*వైయస్సార్సీపి ఎస్సి విభాగం రాష్ట్ర ప్రధాన కార్యదర్శి*  

*అవనిగడ్డ నియోజకవర్గం, కృష్ణాజిల్లా*