"మీసేవా కేంద్రాలపై ఏసీబీ పంజా: అల్వాల్, ఖైరతాబాద్ సహా పలుచోట్ల సోదాలు.|
హైదరాబాద్ : తెలంగాణ రాష్ట్ర అవినీతి నిరోధక శాఖ (ACB) బుధవారం హైదరాబాద్‌లోని పలు మీసేవా కేంద్రాలపై ఏకకాలంలో మెరుపు దాడులు నిర్వహించింది. అల్వాల్, ఖైరతాబాద్, అంబర్‌పేట్, మల్లేపల్లి వంటి కీలక ప్రాంతాల్లోని కేంద్రాల్లో ఈ సోదాలు కొనసాగుతున్నాయి.
పలు మీసేవా కేంద్రాల్లో కులం, ఆదాయం, నివాస ధృవీకరణ పత్రాల జారీ కోసం సిబ్బంది దళారులతో చేతులు కలిపి సామాన్య ప్రజల నుండి అక్రమంగా డబ్బులు వసూలు చేస్తున్నారనే నమ్మదగిన సమాచారంతో అధికారులు రంగంలోకి దిగారు.
ముఖ్యంగా అల్వాల్ మీసేవా కేంద్రంలో మధ్యవర్తుల ప్రమేయం ఎక్కువగా ఉన్నట్లు అధికారులు గుర్తించారు.
సోదాల సమయంలో అధికారులు దళారుల మొబైల్ ఫోన్లను స్వాధీనం చేసుకున్నారు. వారిలోని వాట్సాప్ చాట్లు, PhonePe మరియు GPay వంటి డిజిటల్ లావాదేవీలను నిశితంగా పరిశీలిస్తున్నారు. ఈ వసూళ్లలో మీసేవా సిబ్బందితో పాటు రెవెన్యూ మరియు జీహెచ్‌ఎంసీ (GHMC) అధికారుల పాత్రపై కూడా ఏసీబీ ఆరా తీస్తోంది.
ప్రస్తుతానికి సోదాలు ఇంకా కొనసాగుతుండటంతో, స్వాధీనం చేసుకున్న నగదు మరియు అదుపులోకి తీసుకున్న వ్యక్తుల పూర్తి వివరాలను విచారణ ముగిసిన తర్వాత అధికారికంగా వెల్లడిస్తామని అధికారులు తెలిపారు.
ప్రభుత్వ కార్యాలయాల్లో ఎవరైనా లంచం డిమాండ్ చేస్తే భయపడకుండా వెంటనే ఏసీబీ టోల్ ఫ్రీ నెంబర్ 1064 కు ఫోన్ చేసి ఫిర్యాదు చేయాలని అధికారులు ప్రజలకు సూచించారు.
#sidhumaroju
Alwal
