తిరుపతి ఎయిర్‌పోర్ట్ ప్రైవేటీకరణకు కేంద్రం గ్రీన్ సిగ్నల్.
దేశంలోని 11 విమానాశ్రయాలను ప్రైవేటు సంస్థలకు అప్పగించే ప్రక్రియను కేంద్ర ప్రభుత్వం వేగవంతం చేసింది. ఇందులో భాగంగా ఆంధ్రప్రదేశ్‌లోని తిరుపతి విమానాశ్రయాన్ని తమిళనాడులోని తిరుచ్చి అంతర్జాతీయ విమానాశ్రయంతో కలిపి (బండ్లింగ్) ప్రైవేటు సంస్థలకు అప్పగించేందుకు ఎయిర్‌పోర్ట్స్ అథారిటీ ఆఫ్ ఇండియా ఎక్స్‌ప్రెషన్ ఆఫ్ ఇంటరెస్ట్ (EoI) జారీ చేసింది. పబ్లిక్-ప్రైవేట్ పార్ట్‌నర్‌షిప్ (పీపీపీ) పద్ధతిలో ఈ విమానాశ్రయాల నిర్వహణ, అభివృద్ధి, ఆధునికీకరణ బాధ్యతలను ప్రైవేటు సంస్థలు చూసుకుంటాయి.
ఈసారి కేంద్రం తొలిసారిగా బండ్లింగ్ విధానాన్ని అనుసరిస్తోంది. వాణిజ్యపరంగా లాభదాయకతను పెంచేందుకు, తక్కువ రద్దీ ఉన్న విమానాశ్రయాన్ని, రద్దీగా ఉండే విమానాశ్రయంతో జత చేస్తున్నారు. ఈ 11 విమానాశ్రయాల అభివృద్ధికి ప్రైవేటు సంస్థల నుంచి సుమారు రూ. 8,622 కోట్ల పెట్టుబడులు వస్తాయని అంచనా వేస్తున్నారు. విమానాశ్రయాల్లో మౌలిక వసతులను మెరుగుపరచడం, నాన్-ఏరోనాటికల్ ఆదాయాన్ని (రిటైల్, కార్గో) పెంచడం దీని ముఖ్య ఉద్దేశం.
