చీరాల N.R.& P.M. హైస్కూల్ వాకర్స్ అసోసియేషన్ ఆధ్వర్యంలో అసోసియేషన్ సభ్యుడు, N.R.& P.M. హైస్కూల్ ప్రధానోపాధ్యాయులు **బి. సాల్మన్ రాజు**కు ఘన సన్మానం నిర్వహించారు. ఇటీవల ఉపాధ్యాయ దినోత్సవం సందర్భంగా విజయవాడలోని ఏ కన్వెన్షన్‌లో గౌరవ ముఖ్యమంత్రి **నారా చంద్రబాబు నాయుడు**, విద్యాశాఖ మంత్రి **నారా లోకేష్** చేతుల మీదుగా రాష్ట్ర ఉత్తమ ప్రధానోపాధ్యాయుల అవార్డును అందుకున్న సందర్భంగా ఈ సన్మాన కార్యక్రమాన్ని నిర్వహించారు.

ఈ సందర్భంగా వాకర్స్ అసోసియేషన్ అధ్యక్షులు **పోలుదాసు రామకృష్ణ** మాట్లాడుతూ.. పేరాల ఆంధ్రరత్న మున్సిపల్ హైస్కూల్‌లో విద్యాభ్యాసం పూర్తి చేసిన బి. సాల్మన్ రాజు 1990లో అదే పాఠశాలలో గణిత ఉపాధ్యాయుడిగా ఉద్యోగంలో చేరారని తెలిపారు. 1998లో జిల్లా ఉత్తమ ఉపాధ్యాయ అవార్డును అందుకున్నారని, N.C.C. అధికారిగా 15 సంవత్సరాల పాటు సేవలందించి ఉత్తమ అధికారిగా గుర్తింపు పొందారని పేర్కొన్నారు.

అనంతరం ప్రధానోపాధ్యాయుడిగా పదోన్నతి పొంది సుమారు 35 సంవత్సరాల పాటు అదే పాఠశాలలో సేవలందించిన ఆయన ఇటీవల బదిలీపై N.R.& P.M. హైస్కూల్‌కు వచ్చారని తెలిపారు. విద్యార్థులకు గణితాన్ని సులభంగా, అర్థమయ్యే రీతిలో బోధిస్తూ విద్యారంగంలో విశిష్ట సేవలు అందించినందుకు రాష్ట్ర ఉత్తమ ప్రధానోపాధ్యాయుల అవార్డు రావడం తమ అసోసియేషన్ సభ్యులందరికీ ఎంతో ఆనందంగా ఉందన్నారు.

అవార్డు అందుకున్న సాల్మన్ రాజును వాకర్స్ అసోసియేషన్ సభ్యులు శాలువా కప్పి ఘనంగా సన్మానించి అభినందనలు తెలిపారు. అనంతరం అసోసియేషన్ సభ్యులకు అల్పాహారం ఏర్పాటు చేశారు.ఈ కార్యక్రమంలో చారగుళ్ల గురుప్రసాద్, సుధాకరరావు, బాల సుబ్బారావు, కొమ్మూరి వీరాంజనేయులు, నారాయణమూర్తి, డి.వి. సురేష్, సర్విసెట్టి సుబ్బరామయ్య, నారాయణ, ఎం.ఎస్. సత్యనారాయణ, బ్రహ్మానందం, శ్రీను, వీరాంజనేయులు, శివాంజనేయ ప్రసాద్ తదితర వాకింగ్ సభ్యులు పాల్గొన్నారు.