రియల్ ఎస్టేట్ రంగాన్ని ప్రోత్సహించడంతో పాటు, మౌలిక సదుపాయాల కల్పనలో భూములను కోల్పోయిన వారికి సరైన పరిహారం అందించే దిశగా తెలంగాణ ప్రభుత్వం టీడీఆర్ నిబంధనలలో కీలక మార్పులు చేస్తూ జీవో నెం. 16ను విడుదల చేసింది. ఈ కొత్త నిబంధనలు హైదరాబాద్‌లోని ఔటర్ రింగ్ రోడ్ పరిధి వరకు ఉన్న కోర్ అర్బన్ రీజియన్‌లోని అన్ని ప్రాంతాలకు వర్తిస్తాయి. ప్రధానంగా నగరంలో పెరుగుతున్న హై-రైజ్ బిల్డింగ్‌ల నిర్మాణాలను నియంత్రించడంతో పాటు, టీడీఆర్ మార్కెట్‌కు ఉన్న డిమాండ్‌ను పెంచడం ఈ నిర్ణయం వెనుక ఉన్న ప్రధాన ఉద్దేశం.

‎నూతన నిబంధనల ప్రకారం, 10 అంతస్తుల కంటే ఎక్కువ ఎత్తు ఉండే ప్రతి నివాస భవన నిర్మాణానికి టీడీఆర్ వినియోగం ఇప్పుడు తప్పనిసరి. 11వ అంతస్తు నుండి పైకి నిర్మించే ప్రతి చదరపు అడుగులో 10 శాతం విస్తీర్ణానికి సమానమైన టీడీఆర్ సర్టిఫికేట్లను బిల్డర్లు సమర్పించాల్సి ఉంటుంది. అంటే, ఒక బిల్డర్ 10 అంతస్తుల పైన అదనంగా ఎంత నిర్మాణం చేపడితే, అందులో పదో వంతు టీడీఆర్ రూపంలో ప్రభుత్వం నుండి లేదా మార్కెట్ నుండి కొనుగోలు చేయాలి. ఇది కొత్త ప్రాజెక్టులకే కాకుండా, పాత ప్లాన్లలో మార్పులు కోరే వారికి, అదనపు అంతస్తుల అనుమతులు తీసుకునే వారికి కూడా వర్తిస్తుంది.

‎భూసేకరణలో భూములు కోల్పోయిన వారికి ఇచ్చే పరిహారం విషయంలో కూడా ప్రభుత్వం స్పష్టమైన స్లాబ్ విధానాన్ని ప్రకటించింది. చెరువుల ఎఫ్‌టీఎల్ పరిధిలో భూములు ఇచ్చే వారికి 200 శాతం, బఫర్ జోన్లలో ఇచ్చే వారికి 300 శాతం, ఇక రోడ్ల విస్తరణ లేదా నాలాల అభివృద్ధి కోసం భూములు ఇచ్చే వారికి 400 శాతం టీడీఆర్ పరిహారంగా లభిస్తుంది. దీనివల్ల బాధితులకు నగదు పరిహారం కంటే ఎక్కువ విలువైన అభివృద్ధి హక్కులు లభిస్తాయి, తద్వారా వారు వాటిని బిల్డర్లకు అమ్ముకుని లాభపడవచ్చు.

‎ప్రభుత్వ తాజా నిర్ణయంతో మార్కెట్‌లో నిల్వ ఉన్న సుమారు రూ.2,000 కోట్ల విలువైన టీడీఆర్ బాండ్లకు భారీ డిమాండ్ ఏర్పడనుంది. అయితే, ఈ నిబంధనల వల్ల హై-రైజ్ భవనాల నిర్మాణ వ్యయం చదరపు అడుగుకు సుమారు 200 నుండి 400 వరకు పెరిగే అవకాశం ఉందని రియల్ ఎస్టేట్ నిపుణులు అంచనా వేస్తున్నారు. ముఖ్యంగా వెస్ట్ హైదరాబాద్‌లోని ఫైనాన్షియల్ డిస్ట్రిక్ట్, కోకాపేట, నానక్‌రామ్‌గూడ వంటి ప్రాంతాల్లో ఈ ప్రభావం ఎక్కువగా ఉండనుంది. నిర్మాణ వ్యయం పెరగడం వల్ల భవిష్యత్తులో అపార్ట్‌మెంట్ల ధరలు కూడా పెరిగే అవకాశం ఉంది.

‎

‎