కాకినాడ జిల్లా సామర్లకోట మండలం వేట్లపాలెం గ్రామంలో జరిగిన బాణాసంచా ప్రమాద ఘటనపై ముఖ్యమంత్రి నారా చంద్రబాబు నాయుడు తీవ్రంగా స్పందించారు. ఈ విషాద ఘటనపై సమగ్ర విచారణకు ఆదేశించిన ఆయన, ప్రాథమిక నివేదికల ఆధారంగా బాధ్యతా రాహిత్యం వహించిన అధికారులపై చర్యలు ప్రకటించారు.

పెద్దాపురం ఆర్డీఓ, సంబంధిత డిఎస్పీ, జిల్లా కార్మికశాఖ అధికారి, జిల్లా అగ్నిమాపక శాఖ అధికారి సహా నలుగురు అధికారులను సస్పెండ్ చేస్తున్నట్లు ముఖ్యమంత్రి వెల్లడించారు. భద్రతా ప్రమాణాల అమలులో లోపాలు ఉన్నాయనే అంశంపై ప్రభుత్వం తీవ్రంగా పరిగణించినట్లు తెలిపారు.

ఇలాంటి ప్రమాదకర పరిశ్రమల్లో కట్టుదిట్టమైన పర్యవేక్షణ అవసరమని సీఎం పేర్కొన్నారు. భవిష్యత్తులో ఇలాంటి దుర్ఘటనలు పునరావృతం కాకుండా భద్రతా నిబంధనలను కఠినంగా అమలు చేయాలని సంబంధిత శాఖలను ఆదేశించారు.

ప్రమాదానికి గల ఖచ్చితమైన కారణాలను గుర్తించి బాధ్యులపై మరిన్ని చర్యలు తీసుకునేందుకు విచారణ కొనసాగుతోందని ప్రభుత్వం స్పష్టం చేసింది.