తెలంగాణ: అప్పుల ఊబిలో రాష్ట్రం- కుదేలైన ఖజానా .|

హైదరాబాద్: తెలంగాణ రాష్ట్రం తీవ్రమైన ఆర్థిక సంక్షోభం దిశగా పయనిస్తోందా? అంటే అవుననే అంటున్నాయి తాజా గణాంకాలు. 

బడ్జెట్ అంచనాలను అందుకోవడంలో రేవంత్ ప్రభుత్వం ఘోరంగా విఫలమవ్వడమే కాకుండా, రాష్ట్రం అప్పుల ఊబిలో కూరుకుపోతోంది. కంప్ట్రోలర్ అండ్ ఆడిటర్ జనరల్ (CAG) విడుదల చేసిన తాజా నివేదిక ప్రకారం, రాష్ట్ర ఆర్థిక పరిస్థితి అత్యంత ఆందోళనకరంగా ఉంది.

2024-25 ఆర్థిక సంవత్సరానికి గానూ రాష్ట్ర ప్రభుత్వం రూ. 2.29 లక్షల కోట్ల రెవెన్యూ రాబడిని అంచనా వేయగా, జనవరి నాటికి కేవలం రూ. 1.38 లక్షల కోట్లు మాత్రమే వసూలైంది. అంటే ఆర్థిక సంవత్సరం ముగియవస్తున్నా, లక్ష్యంలో కేవలం 60 శాతం మాత్రమే రావడం గమనార్హం.

గతంలో సొంత రాబడిలో దేశంలోని టాప్ 5 రాష్ట్రాల్లో ఒకటిగా నిలిచిన తెలంగాణ, గత రెండేళ్లలో అట్టడుగు స్థానాలకు పడిపోవడం గమనార్హం.

రాష్ట్ర ప్రభుత్వ అప్పులు ఆకాశాన్ని తాకుతున్నాయి. పది నెలల కాలానికి రూ. 54,009 కోట్ల అప్పులు చేయాలని అంచనా వేయగా, ఇప్పటికే అది రూ. 69,148 కోట్లకు చేరుకుంది. ఇక కార్పొరేషన్ల ద్వారా తీసుకున్న లెక్కలు లేని అప్పులు దీనికి అదనం. ప్రస్తుతం రాష్ట్ర మొత్తం అప్పు రూ. 3 లక్షల కోట్లకు పైగానే ఉంది. వచ్చిన ఆదాయమంతా పాత అప్పుల వడ్డీలకే సరిపోతుండటంతో, కొత్త అభివృద్ధి పనులకు నిధుల కొరత ఏర్పడింది.

ఆదాయం మందగించడం, వ్యయాలు అదుపు తప్పడంతో సంక్షేమ పథకాల అమలు ప్రశ్నార్థకంగా మారింది. ముఖ్యంగా 'రైతుబంధు' వంటి కీలక పథకానికి నిధుల సర్దుబాటు చేయడం ప్రభుత్వానికి తలకు మించిన భారంగా మారింది. తెస్తున్న అప్పులకు, అమలు చేయాల్సిన గ్యారంటీలకు పొంతన కుదరడం లేదు. సంక్షేమ పథకాలను కొనసాగించలేక ప్రభుత్వం చేతులెత్తేసే పరిస్థితి కనిపిస్తోందని ఆర్థిక నిపుణులు హెచ్చరిస్తున్నారు.

మొత్తానికి, ఆదాయ మార్గాలను పెంచుకోకుండా కేవలం అప్పుల మీద ఆధారపడటం వల్ల తెలంగాణ భవిష్యత్తు అంధకారంలో పడే ప్రమాదం ఉందని విశ్లేషకులు ఆందోళన వ్యక్తం చేస్తున్నారు.

#sidhumaroju

Alwal