🎤ఆసిఫాబాద్ (భారత్ ఆవాజ్ న్యూస్ ప్రతినిధి జగదీష్) కుమురం భీమ్ ఆసిఫాబాద్ జిల్లా ప్రతినిధి: తెలంగాణ రాష్ట్ర పోలీస్ రిక్రూట్‌మెంట్ బోర్డ్ (TSLPRB) ఇటీవల విడుదల చేసిన నోటిఫికేషన్‌ను పురస్కరించుకుని, జిల్లా యువతీ యువకుల కోసం ప్రత్యేకంగా ఉచిత పోలీస్ కోచింగ్ కేంద్రాన్ని ఏర్పాటు చేస్తున్నట్లు ఆసిఫాబాద్ జిల్లా ఎస్పీ నితికా పంత్ గారు తెలిపారు. పోలీస్ శాఖలోని వేర్వేరు విభాగాలలో రాష్ట్రవ్యాప్తంగా మొత్తం 7,437 ఉద్యోగాల భర్తీకి భారీ నోటిఫికేషన్ రాగా, ఇందులో మన ఆసిఫాబాద్ జిల్లాకు ప్రత్యేకంగా 139 పోస్టులు కేటాయించబడినట్లు ఆమె పేర్కొన్నారు. ఈ సందర్భంగా జిల్లా ఎస్పీ నితికా పంత్ గారు మాట్లాడుతూ, జిల్లాకు చెందిన నిరుద్యోగ యువతీ యువకులు ఈ పోటీ పరీక్షల్లో రాణించి, ఖచ్చితంగా ప్రభుత్వ ఉద్యోగాలు సాధించాలనే సంకల్పంతో జిల్లా పోలీస్ శాఖ ఆధ్వర్యంలో 3 నెలల పాటు ఉచిత వసతితో కూడిన పోలీస్ శిక్షణ కేంద్రాన్ని ఏర్పాటు చేస్తున్నట్లు వివరించారు. ఈ కోచింగ్ యొక్క ప్రత్యేకత ఏమిటంటే, ఎంపికైన అభ్యర్థులు పూర్తిగా కోచింగ్ కేంద్రంలోనే ఉండి చదువుకోవాల్సి ఉంటుంది. వారికి అక్కడే ఉచిత వసతి, భోజన సదుపాయాలు కల్పిస్తారు. అనుభవజ్ఞులైన, నిపుణులైన అధ్యాపకులతో పోలీస్ పరీక్షల పూర్తి పాఠ్యప్రణాళికను (Syllabus) బోధించడంతో పాటు, ప్రిపరేషన్ మరియు నిరంతర పరీక్షల నిర్వహణ అంతా ఒకే ప్రాంగణంలో జరుగుతుందని ఎస్పీ తెలిపారు. ఇంటర్మీడియట్ పాస్ అయి, పోలీస్ ఉద్యోగం సాధించాలనే పట్టుదల ఉన్న యువతీ యువకులు ఈ ఉచిత శిక్షణకు అర్హులని పేర్కొన్నారు. శిక్షణకు అర్హులైన అభ్యర్థుల ఎంపిక కోసం ఆగస్టు 15న ఒక ప్రవేశ పరీక్ష నిర్వహించబడుతుందని, ఈ పరీక్షలో ప్రతిభ కనబరిచిన అభ్యర్థులను మాత్రమే ఈ ఉచిత కోచింగ్‌కు ఎంపిక చేయడం జరుగుతుందని స్పష్టం చేశారు. ఆసక్తి గల అభ్యర్థులు వెంటనే తమ సమీపంలో ఉన్న పోలీస్ స్టేషన్‌ను సంప్రదించవలసి ఉంటుందని ఎస్పీ నితికా పంత్ సూచించారు. అక్కడ పోలీస్ అధికారులకు తమ ఇంటర్మీడియట్ మార్క్స్ షీట్ చూపించి, తమ పేరు మరియు మొబైల్ నంబర్‌ను నమోదు చేసుకోవాలని కోరారు. పోలీస్ ఉద్యోగం సాధించి, ఉజ్వల భవిష్యత్తును సొంతం చేసుకోవాలనుకునే జిల్లా యువతకు ఇదొక గొప్ప అవకాశమని, అర్హులైన ప్రతి ఒక్కరూ ఈ అవకాశాన్ని సద్వినియోగం చేసుకోవాలని ఆసిఫాబాద్ జిల్లా పోలీస్ శాఖ తరఫున ఆమె పిలుపునిస్తూ అభ్యర్థులందరికీ ఆల్ ది బెస్ట్ తెలియజేశారు.