మాదిగలను కించపరిస్తే ఊరుకోం కాంగ్రెస్ నేతపై ఎమ్మార్పీఎస్, ఎంఎస్పీ నేతల తీవ్ర ఆగ్రహం
🎤భారత్ ఆవాజ్ న్యూస్ - ఆసిఫాబాద్: మాదిగలు ఓటు వేయకుండానే కాంగ్రెస్ అధికారంలోకి వచ్చిందా అని ఎమ్మార్పీఎస్ జాతీయ ఉపాధ్యక్షుడు రేగుంట కేశవ్ తీవ్ర ఆగ్రహం వ్యక్తం చేశారు. మాదిగలను వివక్ష చూపుతూ, కించపరిచేలా మాట్లాడిన కొమురం భీం ఆసిఫాబాద్ జిల్లా కాంగ్రెస్ జనరల్ సెక్రటరీ, మాజీ ఏఎంసీ చైర్మన్ గాధవేని మల్లేష్‌ను పార్టీ నుండి తక్షణమే బహిష్కరించాలని, ఆయనపై ఎస్సీ, ఎస్టీ అట్రాసిటీ కేసు నమోదు చేయాలని ఎమ్మార్పీఎస్ మరియు ఎంఎస్పీ నేతలు డిమాండ్ చేశారు.సామాజిక మాధ్యమాల్లో మల్లేష్ మాట్లాడిన ఫోన్ కాల్ ఆడియో రికార్డింగ్ వైరల్ కావడంతో ఆగ్రహించిన నిరసనకారులు జిల్లా కేంద్రంలో ఉధృత నిరసన చేపట్టారు. నాయకులు, కార్యకర్తలు పెద్ద సంఖ్యలో తరలివచ్చి అంబేద్కర్ చౌక్ నుండి వివేకానంద చౌక్ వరకు భారీ ప్రదర్శన నిర్వహించి, మల్లేష్ దిష్టిబొమ్మను దహనం చేశారు.ఈ ఘటనపై ఎమ్మార్పీఎస్ నేతలు స్థానిక (C.I) కి అధికారికంగా ఫిర్యాదు చేశారు. ఈ సందర్భంగా నాయకులు మాట్లాడుతూ, పార్టీ పదవులకు మాదిగలు పనికిరారా అని ప్రశ్నిస్తూ, ఇప్పటివరకు తమ సామాజికవర్గానికి పార్టీలో ఎటువంటి పదవులు ఇవ్వలేదని ఆవేదన వ్యక్తం చేశారు. తమపై వివక్ష చూపుతూ వ్యాఖ్యలు చేసిన ఆయనపై కాంగ్రెస్ పార్టీ క్రమశిక్షణా చర్యలు తీసుకొని పార్టీ నుండి బహిష్కరించాలని, పోలీసులు కేసు నమోదు చేయాలని డిమాండ్ చేశారు. నిందితుడిపై తక్షణమే కఠిన చట్టపరమైన చర్యలు తీసుకోకపోతే రాష్ట్రవ్యాప్తంగా ఆందోళనలను ఉధృతం చేస్తామని హెచ్చరించారు.
