ఆసిఫాబాద్ (భారత్ ఆవాజ్ న్యూస్) కొమురం భీం ఆసిఫాబాద్ జిల్లాలో ఆగస్టు 15న జరగనున్న స్వాతంత్ర్య దినోత్సవ వేడుకలను అత్యంత ఘనంగా నిర్వహించాలని జిల్లా కలెక్టర్ హరిత అధికారులను ఆదేశించారు. శనివారం జిల్లా కలెక్టరేట్ సమావేశ మందిరంలో వివిధ శాఖల అధికారులతో కలిసి ఆమె ముందస్తు ఏర్పాట్లపై ఉన్నత స్థాయి సమీక్షా సమావేశాన్ని నిర్వహించారు.ఈ సందర్భంగా కలెక్టర్ మాట్లాడుతూ, జాతీయ పండుగను పురస్కరించుకుని జిల్లా కేంద్రంలో ఎలాంటి లోటుపాట్లు లేకుండా అన్ని ఏర్పాట్లు పూర్తి చేయాలని స్పష్టం చేశారు. ముఖ్యంగా పోలీసు గౌరవ వందనం, పతాకావిష్కరణ, నిరంతర విద్యుత్ సరఫరా, వేడుకల ప్రాంగణంలో పారిశుధ్య నిర్వహణ మరియు సాంస్కృతిక కార్యక్రమాలను అన్ని శాఖలు సమన్వయంతో విజయవంతం చేయాలని సూచించారు.విధుల్లో అంకితభావంతో పనిచేసి ఉత్తమ ప్రతిభ కనబరిచిన ప్రభుత్వ ఉద్యోగుల వివరాలను సేకరిస్తున్నట్లు కలెక్టర్ తెలిపారు. ప్రశంసా పత్రాల పంపిణీకి అర్హులైన వారి తుది జాబితాను ఆగస్టు 12వ తేదీ లోగా జిల్లా యంత్రాంగానికి సమర్పించాలని అధికారులను ఆదేశించారు. ఈ సమావేశంలో జిల్లా స్థాయి అధికారులు, వివిధ శాఖల ప్రతినిధులు పాల్గొన్నారు.