నగరవాసుల ప్లేట్లలో 'విషం': భారీగా పట్టుబడ్డ కల్తీ పన్నీరు నిల్వలు.|

హైదరాబాద్ : సికింద్రాబాద్‌లో భారీ కల్తీ పన్నీరు గుట్టురట్టు: 3,000 కిలోలు సీజ్.. ఆరు షాపులపై టాస్క్ ఫోర్స్ మెరుపు దాడులు!

సికింద్రాబాద్: నగర ప్రజల ఆరోగ్యంతో చెలగాటమాడుతున్న కల్తీ మాఫియాపై ఖైరతాబాద్ జోన్ టాస్క్ ఫోర్స్ పోలీసులు విరుచుకుపడ్డారు.

 సికింద్రాబాద్‌ మహంకాళి పోలీస్ స్టేషన్ పరిధిలో గుట్టుచప్పుడు కాకుండా సాగుతున్న కల్తీ పన్నీరు తయారీ కేంద్రాన్ని అధికారులు రట్టు చేశారు.

ఫుడ్ ఇన్‌స్పెక్టర్లతో కలిసి నిర్వహించిన ఈ సంయుక్త దాడుల్లో సుమారు 3,000 కిలోల కల్తీ పన్నీరును పోలీసులు స్వాధీనం చేసుకున్నారు.

నగరంలోని పలు ప్రాంతాలకు ఇక్కడి నుంచే కల్తీ పన్నీరు సరఫరా అవుతున్నట్లు అందిన విశ్వసనీయ సమాచారంతో టాస్క్ ఫోర్స్ రంగంలోకి దిగింది.

శ్రీ బాలాజీ డైరీ ప్రొడక్ట్స్, విజయ్ మిల్క్ అండ్ కర్డ్, షాప్‌తో సహా మొత్తం ఆరు దుకాణాల్లో ఏకకాలంలో తనిఖీలు చేపట్టారు.

భారీగా పట్టుబడ్డ నిల్వలు:

శ్రీ బాలాజీ డైరీ ప్రొడక్ట్స్: ఇక్కడ అత్యధికంగా 1,600 కిలోల కల్తీ పన్నీరును అధికారులు గుర్తించి సీజ్ చేశారు.

విజయ్ మిల్క్ అండ్ కర్డ్ షాప్: ఈ కేంద్రంలో 1,000 కిలోల కల్తీ పన్నీరు లభ్యమైంది.

మిగిలిన నాలుగు షాపుల నుంచి మరో 400 కిలోల పన్నీరును స్వాధీనం చేసుకున్నారు.

తక్కువ ఖర్చుతో పన్నీరు తయారు చేసేందుకు ప్రమాదకరమైన రసాయనాలు, నాణ్యత లేని పదార్థాలను వాడుతున్నట్లు అధికారులు గుర్తించారు.

నగరంలోని ప్రముఖ హోటళ్లు, ఫాస్ట్ ఫుడ్ సెంటర్లకు ఈ పన్నీరును సరఫరా చేస్తున్నట్లు విచారణలో తేలింది.

నిబంధనలు ఉల్లంఘించి కల్తీకి పాల్పడుతున్న నిర్వాహకులపై కఠిన చర్యలు తీసుకుంటామని టాస్క్ ఫోర్స్ పోలీసులు హెచ్చరించారు.

ప్రజలు కూడా పన్నీరు వంటి పాల ఉత్పత్తులు కొనేటప్పుడు జాగ్రత్తగా ఉండాలని సూచించారు.

#sidhumaroju

Alwal