ఉపాధి కల్పనపై బడ్జెట్‌లో ప్రాధాన్యత లేదు: సీపీఎం
రాష్ట్ర అభివృద్ధికి ఉపాధి సృష్టి అత్యంత కీలకమని సీపీఎం నగర కన్వీనర్ పలివెల వీరబాబు పేర్కొన్నారు. గురువారం కాకినాడలో ఆయన మాట్లాడుతూ, యువతకు స్థిరమైన ఉద్యోగాలు కల్పించకుండా సమగ్ర అభివృద్ధి సాధ్యం కాదని అన్నారు.
కూటమి ప్రభుత్వం అధికారంలోకి వస్తే ఐదేళ్లలో 20 లక్షల ఉద్యోగాలు కల్పిస్తామని, అది సాధ్యం కాకపోతే నెలకు రూ.3 వేల నిరుద్యోగ భృతి అందిస్తామని హామీ ఇచ్చిందని ఆయన గుర్తుచేశారు. అయితే ప్రస్తుత బడ్జెట్‌లో ఉపాధి కల్పనకు తగిన ప్రాధాన్యత ఇవ్వలేదని విమర్శించారు.
పరిశ్రమల విస్తరణ, ప్రభుత్వ విభాగాల్లో ఖాళీ పోస్టుల భర్తీ, చిన్న మరియు మధ్య తరహా పరిశ్రమలకు ప్రోత్సాహం వంటి అంశాలపై స్పష్టమైన కార్యాచరణ ప్రణాళికను ప్రకటించాలని ఆయన డిమాండ్ చేశారు. యువతలో పెరుగుతున్న నిరుద్యోగ సమస్యపై ప్రభుత్వం తక్షణ చర్యలు తీసుకోవాలని కోరారు.
రాష్ట్ర భవిష్యత్తు యువత చేతుల్లోనే ఉందని, వారికి ఉపాధి అవకాశాలు కల్పించడం ప్రభుత్వ బాధ్యత అని సీపీఎం నేత పేర్కొన్నారు.
