కొందుర్గు ఎంపీడీవో ఆఫీసులో అధికారుల నిర్లక్ష్య పర్వం.|

హైదరాబాద్ : రంగారెడ్డి జిల్లా కొందుర్గు: ప్రభుత్వ కార్యాలయాల్లో పనివేళలు అంటే అధికారులకు లెక్కలేకుండా పోతోంది. ప్రజల సమస్యల పరిష్కారం కోసం ఏర్పాటు చేసిన కొందుర్గు మండల పరిషత్ కార్యాలయం (MPDO) సోమవారం అధికారుల గైర్హాజరుతో వెలవెలబోయింది. మధ్యాహ్నం గడియారంలో ముల్లు 12 గంటలు దాటుతున్నా, కార్యాలయంలో కుర్చీలు తప్ప అధికారులు ఎవరూ కనిపించకపోవడం గమనార్హం.

ఖాళీ కుర్చీలే ‘స్వాగతం’..

మండలంలోని వివిధ గ్రామాలకు చెందిన ప్రజలు తమ పనుల నిమిత్తం ఉదయం 10 గంటలకే కార్యాలయానికి చేరుకున్నారు. కానీ గంటలు గడుస్తున్నా కార్యాలయంలో ఏ ఒక్క అధికారి కూడా సీటులో లేరు. కార్యాలయం లోపల అధికారులు లేకుండా కేవలం ఖాళీ కుర్చీలు దర్శనమిస్తుండటంతో దూరప్రాంతాల నుండి వచ్చిన ప్రజలు తీవ్ర ఆగ్రహం వ్యక్తం చేస్తున్నారు. అధికారుల కోసం కార్యాలయ ఆవరణలో పడిగాపులు కాస్తూ జనం అసహనానికి గురవుతున్నారు.

వివరణ కోరగా.. విడ్డూరమైన సమాధానం!

దీనిపై కొంతమంది మీడియా ప్రతినిధులు, బాధితులు అధికారులను ఫోన్ ద్వారా వివరణ కోరగా.. వారి నుండి విడ్డూరమైన సమాధానం రావడం గమనార్హం. "మేము ఆఫీసుకే వస్తున్నాం.. కాకపోతే రావడానికి కొద్దిగా సమయం పడుతుంది" అంటూ నిర్లక్ష్యంగా బదులిస్తున్నారు. 12 గంటలు దాటినా ఇంకా ఆఫీస్ కు రాకపోవడం, పైగా సమయం పడుతుందని చెప్పడం అధికారుల బాధ్యతారాహిత్యానికి నిదర్శనమని స్థానికులు మండిపడుతున్నారు.

ప్రభుత్వ నిబంధనలు గాలికేనా?

ప్రభుత్వ నిబంధనల ప్రకారం ఉదయం 10:30 గంటలకే అధికారులు విధులకు హాజరు కావాల్సి ఉండగా, కొందుర్గులో మాత్రం అధికారులు తమ సొంత నిబంధనలను అమలు చేస్తున్నట్లు కనిపిస్తోంది. "ప్రభుత్వ జీతాలు తీసుకుంటూ.. ప్రజలకు అందుబాటులో ఉండకపోతే ఎలా?" అని సామాన్య ప్రజలు ప్రశ్నిస్తున్నారు. అధికారుల ఇష్టారాజ్యం వల్ల సామాన్యుల సమయం, డబ్బు వృధా అవుతున్నాయని వారు ఆవేదన వ్యక్తం చేస్తున్నారు.

కలెక్టర్ చర్యలు తీసుకోవాలి.

జిల్లా ఉన్నతాధికారులు, ముఖ్యంగా జిల్లా కలెక్టర్ గారు ఈ విషయంపై దృష్టి సారించాలని ప్రజలు కోరుతున్నారు. కార్యాలయానికి రాకుండా సమయం పడుతుందని సాకులు చెబుతున్న అధికారులపై కఠిన చర్యలు తీసుకోవాలని, మండల పరిపాలనను గాడిలో పెట్టాలని స్థానికులు డిమాండ్ చేస్తున్నారు.

#sidhumaroju