చింతూరుకు ఎంతో గుర్తింపు తెచ్చిన స్థానిక జిమ్ వెనుక భాగం ప్రస్తుతం మద్యం బాబులకు అడ్డాగా మారింది. ఇక్కడ శిక్షణ పొందిన ఎంతోమంది విద్యార్థులు వెయిట్‌లిఫ్టింగ్, ఇతర వ్యాయామ క్రీడల్లో బంగారు పతకాలు (గోల్డ్ మెడల్స్) సాధించి చింతూరు పేరును నిలబెట్టారు. యువతను ఆరోగ్యంగా, క్రమశిక్షణతో తీర్చిదిద్దాలనే పవిత్ర లక్ష్యంతో నడుస్తున్న ఈ జిమ్ పరిసరాలు ఇప్పుడు అసాంఘిక కార్యకలాపాలకు నిలయంగా మారడంపై క్రీడాకారులు, స్థానికులు తీవ్ర ఆందోళన వ్యక్తం చేస్తున్నారు. మద్యం సేవించడం, వ్యర్థాలు వేయడం కొంతమంది వ్యక్తులు నిత్యం జిమ్ వెనుక బహిరంగంగా మద్యం సేవిస్తూ, ఖాళీ బీరు సీసాలు, ప్లాస్టిక్ గ్లాసులు, ఇతర వ్యర్థాలను అక్కడే పారేస్తున్నారు. మద్యం తాగిన వారు అక్కడే మలమూత్ర విసర్జన చేస్తుండటంతో తీవ్రమైన దుర్వాసన వస్తోంది. పేరుకుపోయిన చెత్త, మురికి నీటి వల్ల దోమలు విపరీతంగా పెరిగిపోయి.. జిమ్‌కు వచ్చే యువతకు మలేరియా, డెంగ్యూ వంటి ప్రాణాంతక వ్యాధులు ప్రబలే ప్రమాదం పొంచి ఉంది. ప్రతిరోజూ వ్యాయామం కోసం వచ్చే విద్యార్థులు, ఉద్యోగులు, యువత తీవ్ర ఇబ్బందులు పడుతున్నారు. ఇక్కడ మద్యం తాగవద్దని వారించినందుకు నిత్యం గొడవలు జరుగుతుండటంతో క్రీడాకారులు భయాందోళనకు గురవుతున్నారు."మా ఉద్దేశం ఎవరినీ ఇబ్బంది పెట్టడం కాదు, ఎవరిపైనా మాకు వ్యక్తిగత వ్యతిరేకత లేదు. కానీ, ఎంతోమంది భవిష్యత్తును తీర్చిదిద్దే క్రీడా ప్రాంగణాన్ని మద్యం అడ్డాగా మార్చడం సరికాదు" అని జిమ్ నిర్వాహకులు ఆవేదన వ్యక్తం చేశారు.కావున, చింతూరు పోలీస్ శాఖ, ఎక్సైజ్ శాఖ, గ్రామ పంచాయతీ, మరియు ఐటీడీఏ (ITDA) అధికారులు తక్షణమే స్పందించి, జిమ్ పరిసరాల్లో పెట్రోలింగ్ నిర్వహించి, అపరిశుభ్రతను తొలగించాలని కోరుతున్నారు. ఎంతోమంది ఛాంపియన్లను తయారుచేస్తున్న ఈ క్రీడా కేంద్రాన్ని, చింతూరు కీర్తిని కాపాడేందుకు అధికారులు చొరవ చూపాలని విజ్ఞప్తి చేస్తున్నారు.

# Yadagiri