మంచిర్యాల జిల్లా లో వర్షాలు...నిన్న రాత్రి నుంచి ఎడతెరిపి లేకుండా వర్షం – రైతు కళ్లలో ఆనందం, పంటలపై కొత్త ఆశలు

మంచిర్యాల, జూలై 29: మంచిర్యాల జిల్లాలో నిన్న రాత్రి నుంచి కురుస్తున్న వర్షాలు రైతుల ముఖాల్లో చిరునవ్వులు పూయించాయి. కొద్దిరోజులుగా వర్షాభావంతో ఆందోళనలో ఉన్న అన్నదాతలకు ఈ వర్షం ఊరటనిచ్చింది. ఎండలతో ఎండిపోయిన పొలాలు ఇప్పుడు వరుణుడి జలధారలతో తడిసి ముద్దవుతున్నాయి.

కరువు పరిస్థితులు ఎదురవుతాయేమోనన్న భయాన్ని తరిమికొడుతూ, ఆకాశాన్ని కమ్ముకున్న మేఘాలు యుద్ధ మేఘాల్లా విరుచుకుపడి జిల్లావ్యాప్తంగా వర్షం కురిపించాయి. చెరువులు, కుంటలు, వాగులు మళ్లీ నీటితో కళకళలాడే సూచనలు కనిపిస్తున్నాయి.

విత్తనాలు వేసిన రైతులకు ఈ వర్షం ఎంతో ఊరటనిచ్చిందని రైతులు ఆనందం వ్యక్తం చేస్తున్నారు. పంటల పెరుగుదలకు ఈ వర్షాలు ఎంతో మేలు చేస్తాయని వ్యవసాయ నిపుణులు అభిప్రాయపడుతున్నారు.

జిల్లాలో మరికొన్ని రోజులు కూడా వర్షాలు కొనసాగే అవకాశముందని వాతావరణ శాఖ సూచించడంతో రైతుల్లో మరింత ఆశావహ వాతావరణం నెలకొంది. ఈ వర్షాలతో భూగర్భ జలమట్టాలు పెరిగి, తాగునీటి సమస్య కూడా కొంతవరకు తగ్గే అవకాశం ఉందని అధికారులు భావిస్తున్నారు.