మేడ్చల్ మల్కాజ్గిరి జిల్లా : మచ్చ బొల్లారం జనప్రియ అపార్ట్‌మెంట్స్ వాసులకు తీవ్రమైన ట్రాఫిక్ కష్టాల నుండి త్వరలోనే పూర్తి విముక్తి లభించనుంది. ఇక్కడి ప్రజల దశాబ్దాల సమస్యను తీరుస్తూ రూ.6.6 కోట్ల భారీ వ్యయంతో అదనపు వెంట్ రైల్వే అండర్ బ్రిడ్జ్ (RUB) నిర్మాణానికి అడుగులు పడ్డాయి. 

ఈ ప్రతిష్టాత్మక ప్రాజెక్టు పనులను మల్కాజ్‌గిరి ఎమ్మెల్యే మర్రి రాజశేఖర్ రెడ్డి వివిధ ప్రభుత్వ శాఖల ఉన్నతాధికారులతో కలిసి క్షేత్రస్థాయిలో స్వయంగా పరిశీలించారు. :

రైల్వే, మున్సిపల్, విద్యుత్, మరియు జలమండలి ఇంజనీరింగ్ అధికారులతో కలిసి ఉమ్మడిగా పర్యటించిన ఎమ్మెల్యే మర్రి రాజశేఖర్ రెడ్డి, గ్రౌండ్ లెవెల్‌లో పనుల పురోగతిని సమీక్షించారు. 

ముఖ్యంగా బ్రిడ్జ్ నిర్మాణానికి అడ్డుగా ఉన్న త్రాగునీటి పైపులైన్లు, సివరేజ్ డ్రైనేజీ లైన్లు మరియు విద్యుత్ స్తంభాల మార్పిడి పనులను వేగవంతం చేయాలని అధికారులను ఆదేశించారు. 

భారీ ఎత్తున పనులు జరిగే సమయంలో స్థానిక ప్రజలకు మరియు వాహనదారులకు ఎలాంటి అసౌకర్యం కలగకుండా ముందస్తుగా కచ్చితమైన ట్రాఫిక్ మళ్లింపు ప్రణాళికలను అమలు చేయాలని స్పష్టం చేశారు. 

అన్ని శాఖల అధికారులు ఒకరితో ఒకరు సమన్వయం పెంచుకుని, ఎక్కడా కాలయాపన జరగకుండా ఈ అదనపు వెంట్ RUB నిర్మాణాన్ని అత్యంత త్వరితగతిన పూర్తి చేయాలని ఆయన కోరారు.

ఈ అదనపు వెంట్ రైల్వే అండర్ బ్రిడ్జ్ అందుబాటులోకి వస్తే మచ్చ బొల్లారం మరియు జనప్రియ పరిసర ప్రాంతాల ప్రజల రాకపోకలు అత్యంత సులభతరం అవుతాయని, ఈ ప్రాంతంలో ట్రాఫిక్ సమస్యలకు శాశ్వత పరిష్కారం లభిస్తుందని ఎమ్మెల్యే ధీమా వ్యక్తం చేశారు. 

ఈ కీలక కార్యక్రమంలో రైల్వే సీనియర్ ఇంజనీర్ రాజేంద్రప్రసాద్, సెక్షన్ ఇంజనీర్ రవి ప్రకాష్, ట్రాఫిక్ ఏసీపీ శివశంకర్, అల్వాల్ మున్సిపల్ ఇంజనీరింగ్ అధికారులు డీఈ మహేష్, ఏఈ రవళి, జలమండలి ట్రాన్స్‌మిషన్ డీఈ సాయి చరిత్ర, విద్యుత్ శాఖ అధికారులు ఏడీఈ రామాచారి, నాగరాజుతో పాటు స్థానిక కాలనీ వాసులు, ప్రజాప్రతినిధులు పెద్ద సంఖ్యలో పాల్గొన్నారు.

#Sidhumaroju

Alwal