ఎమ్మెల్యే గల్లా మాధవికి మంత్రి లోకేశ్ ప్రశంసలు.. పీఏగా ట్రాన్స్‌జెండర్‌కు అవకాశం!
ఎమ్మెల్యే గల్లా మాధవికి మంత్రి లోకేశ్ ప్రశంసలు.. పీఏగా ట్రాన్స్‌జెండర్‌కు అవకాశం!
26-04-2026 Sun 07:09 | Andhra
Galla Madhavi Praised by Minister Lokesh for Appointing Transgender PA
గుంటూరు పశ్చిమ ఎమ్మెల్యేగా గల్లా మాధవి కీలక నిర్ణయం
ట్రాన్స్‌జెండర్‌ను తన వ్యక్తిగత సహాయకురాలిగా నియమించిన వైనం
ఎమ్మెల్యే నిర్ణయంపై మంత్రి నారా లోకేశ్ ప్రత్యేక అభినందనలు
అణగారిన వర్గాలకు సాధికారత కల్పించడమే నిజమైన నాయకత్వమన్న లోకేశ్
గుంటూరు పశ్చిమ నియోజకవర్గ టీడీపీ ఎమ్మెల్యే గల్లా మాధవి తీసుకున్న ఒక నిర్ణయంపై రాష్ట్రవ్యాప్తంగా ప్రశంసలు వెల్లువెత్తుతున్నాయి. ఆమె తన వ్యక్తిగత సహాయకురాలిగా (పీఏ) ఒక ట్రాన్స్‌జెండర్‌ను నియమించి అందరికీ ఆదర్శంగా నిలిచారు. ఈ నిర్ణయాన్ని రాష్ట్ర ఐటీ, మానవ వనరుల శాఖ మంత్రి నారా లోకేశ్ ప్రత్యేకంగా అభినందించారు. గల్లా మాధవి నాయకత్వ పటిమను చాటారని, అణగారిన వర్గాలకు సాధికారత కల్పించడమే నిజమైన నాయకత్వం అని ఆయన ట్విట్టర్ వేదికగా ప్రశంసించారు.
వివరాల్లోకి వెళితే, బీకాం పూర్తి చేసిన ఒక ట్రాన్స్‌జెండర్ మహిళ ఉద్యోగం కోసం ఎమ్మెల్యే గల్లా మాధవి కార్యాలయాన్ని సంప్రదించారు. ఆమె విద్యార్హత, ఉపాధి అవసరాన్ని గుర్తించిన ఎమ్మెల్యే, వెంటనే తన పీఏగా నియమిస్తున్నట్లు ప్రకటించారు. ట్రాఫిక్ సిగ్నళ్లు, రైళ్లలో ట్రాన్స్‌జెండర్లు పడుతున్న ఇబ్బందులను చూసి చలించిపోయానని, వారికి గౌరవప్రదమైన జీవనోపాధి కల్పించాలనే ఉద్దేశంతోనే ఈ నిర్ణయం తీసుకున్నానని గల్లా మాధవి వివరించారు.
ట్రాన్స్‌జెండర్ల ఉపాధి సమస్యలను ముఖ్యమంత్రి నారా చంద్రబాబు నాయుడు దృష్టికి తీసుకెళ్లి, వారి సంక్షేమానికి ప్రభుత్వం తరఫున మరిన్ని చర్యలు తీసుకునేలా కృషి చేస్తానని ఆమె హామీ ఇచ్చారు. గల్లా మాధవి తీసుకున్న ఈ నిర్ణయం సమాజంలో ఇతరులు అనుసరించడానికి ఒక గోల్డెన్ స్టాండర్డ్ సెట్ చేసిందని లోకేశ్ తన పోస్టులో పేర్కొనడం విశేషం.
