తెలంగాణ మోడల్ స్కూల్ ప్రవేశ పరీక్షకు ఏర్పాట్లు పూర్తి

మరిపెడ, ఏప్రిల్ 10:తెలంగాణ మోడల్ పాఠశాలల్లో 2026-27 విద్యా సంవత్సరానికి 6వ తరగతి నుండి 10వ తరగతి వరకు ప్రవేశాల కోసం నిర్వహించే ప్రవేశ పరీక్షను ఈ నెల 19న నిర్వహించనున్నట్లు ప్రిన్సిపాల్ అఖ్తరుజ్జమాన్ తెలిపారు.6వ తరగతి ప్రవేశ పరీక్ష ఉదయం 10.00 గంటల నుండి మధ్యాహ్నం 12.00 గంటల వరకు జరుగుతుందని, 7వ తరగతి నుండి 10వ తరగతి వరకు పరీక్షలు మధ్యాహ్నం 2.00 గంటల నుండి సాయంత్రం 4.00 గంటల వరకు నిర్వహించబడతాయని వెల్లడించారు.పరీక్షకు హాజరయ్యే విద్యార్థులు తమ హాల్ టికెట్లను ఈ నెల 10వ తేదీ నుండి అధికారిక వెబ్‌సైట్ ద్వారా డౌన్‌లోడ్ చేసుకోవచ్చని తెలిపారు.ఆన్లైన్‌లో దరఖాస్తు చేసిన అభ్యర్థులందరూ మరిపెడలోని తెలంగాణ మోడల్ పాఠశాలలో హాల్ టికెట్‌తో పరీక్షకు హాజరుకావాలని సూచించారు.పరీక్షలో మొత్తం 100 ఆబ్జెక్టివ్ ప్రశ్నలు ఉంటాయని, సమాధానాలను OMR షీట్‌పై గుర్తించాల్సి ఉంటుందని తెలిపారు. పరీక్షా హాలులోకి ఎగ్జామ్ ప్యాడ్, హాల్ టికెట్, బాల్ పెన్నులు, నీటి సీసా మినహా ఇతర వస్తువులు అనుమతించబడవని స్పష్టం చేశారు.విద్యార్థులు సమయానికి పరీక్ష కేంద్రానికి చేరుకుని నియమాలను పాటించాలని ప్రిన్సిపాల్ సూచించారు.