ఫోన్ కొట్టేసి... ఖాతా ఖాళి .!

మేడ్చల్ మల్కాజ్గిరి జిల్లా : నిత్యం రద్దీగా ఉండే ప్రాంతాల్లో మొబైల్ దొంగలు రెచ్చిపోతున్నారు.

ఫోన్ దొంగిలించడమే కాకుండా, అందులోని యూపీఐ (UPI) యాప్‌లను ఉపయోగించి క్షణాల్లో బ్యాంకు ఖాతాలను ఖాళీ చేస్తున్నారు. తాజాగా అల్వాల్ ప్రాంతంలో ఇలాంటి ఘటనే ఒకటి వెలుగుచూసింది.

సంఘటన వివరాలు: ఓల్డ్ అల్వాల్, సూర్య నగర్‌కు చెందిన కొండం నాగభూషణం అనే ప్రైవేట్ ఉద్యోగి ఈ నెల 19వ తేదీ ఉదయం 10:30 గంటల సమయంలో జొన్నబండలోని అంబేద్కర్ నగర్ బస్ స్టాప్ సమీపంలో ఉన్న అగర్వాల్ కిరాణా షాపునకు వెళ్లారు. 

అక్కడ విపరీతమైన రద్దీ ఉండటంతో, సామాన్లు కొనుగోలు చేసి నగదు చెల్లించిన తర్వాత తన మొబైల్ ఫోన్‌ను షర్ట్ జేబులో పెట్టుకున్నారు. కొద్ది దూరం నడిచిన తర్వాత తన మొబైల్ మాయమైనట్లు ఆయన గుర్తించారు.

ఖాతా ఖాళీ చేసిన కేటుగాళ్లు: ఫోన్ పోయిన కొద్దిసేపటికే గుర్తుతెలియని వ్యక్తులు బాధితుడి ఫోన్ ద్వారా రెండు విడతలుగా ₹4,000 మరియు ₹19,999 చొప్పున మొత్తం ₹23,999 నగదును అనధికారికంగా బదిలీ చేసుకున్నారు.

వెంటనే అప్రమత్తమైన బాధితుడు కేంద్ర ప్రభుత్వ అధికారిక వెబ్‌సైట్ అయిన CEIR (Central Equipment Identity Register) పోర్టల్‌లో ఫిర్యాదు (నెం. 202603190712224417) చేశారు.

పోలీసులకు ఫిర్యాదు: తన అనారోగ్య సమస్యల కారణంగా ఆలస్యంగానైనా పోలీసులను ఆశ్రయించి ఫిర్యాదు చేసినట్లు నాగభూషణం తెలిపారు. ఫోన్ దొంగిలించిన వారిని గుర్తించి, తన సొమ్మును తిరిగి ఇప్పించాలని ఆయన పోలీసులను కోరారు.

ప్రజలకు హెచ్చరిక: ఫోన్ పోయిన వెంటనే కేవలం పోలీసులకు ఫిర్యాదు చేయడమే కాకుండా, మొట్టమొదటగా తమ సిమ్ కార్డును బ్లాక్ చేయాలని మరియు యూపీఐ లావాదేవీలను నిలిపివేయాలని నిపుణులు సూచిస్తున్నారు. 

లేనిపక్షంలో ఇలాగే బ్యాంకు ఖాతాల నుండి సొమ్ము మాయమయ్యే ప్రమాదం ఉందని హెచ్చరిస్తున్నారు.

ఫిర్యాదు తీసుకున్న అల్వాల్ క్రైమ్ సిబ్బంది దర్యాప్తు ప్రారంభించారు.

#sidhumaroju 

Alwal