ఆసిఫాబాద్, జూలై 25 (భారత్ ఆవాజ్ న్యూస్ ప్రతినిధి జగదీష్): కుమురం భీం ఆసిఫాబాద్ జిల్లా కేంద్రంలో కీలక పోలీస్ అధికారి బదిలీ అయ్యారు. ఆసిఫాబాద్ టౌన్ సర్కిల్ ఇన్స్పెక్టర్ (సీఐ) బాలాజీ వరప్రసాద్‌పై బదిలీ వేటు పడింది. ఆయనను తక్షణమే ఇక్కడి నుంచి బదిలీ చేస్తూ మల్టీ జోన్-1 (IG) అధికారిక ఉత్తర్వులు జారీ చేశారు. గత కొంతకాలంగా సీఐ బాలాజీ వరప్రసాద్‌పై వివిధ రకాల ఆరోపణలు వస్తున్నట్లు తెలుస్తోంది. ఈ నేపథ్యంలోనే ఉన్నతాధికారులు స్పందించి ఈ హఠాత్ బదిలీ నిర్ణయం తీసుకున్నట్లు సమాచారం. ఆయనను తన ప్రస్తుత బాధ్యతల నుంచి తప్పుకుని, హైదరాబాద్‌లోని మల్టీ జోన్-1 కార్యాలయంలో రిపోర్ట్ చేయాల్సిందిగా ఐజీ ఆదేశించారు. బాలాజీ వరప్రసాద్ బదిలీతో ఖాళీ అయిన ఆసిఫాబాద్ టౌన్ సీఐ స్థానంలో కొత్త అధికారిని నియమించారు. ప్రస్తుతం రామగుండం పోలీస్ కమిషనరేట్ పరిధిలో టాస్క్ ఫోర్స్ సీఐగా విధులు నిర్వహిస్తున్న నీలం రవికి ఆసిఫాబాద్ టౌన్ సీఐగా బాధ్యతలు అప్పగిస్తూ ప్రభుత్వం కొత్త పోస్టింగ్ ఇచ్చింది. వీలైనంత త్వరలోనే నీలం రవి ఆసిఫాబాద్ టౌన్ సీఐగా కొత్త బాధ్యతలను స్వీకరించనున్నారు.