హైదరాబాద్ : అయోధ్య రామ మందిరంలో విరాళాల అక్రమాల ఆరోపణలపై కొనసాగుతున్న దర్యాప్తులో ప్రత్యేక దర్యాప్తు బృందం (SIT) కీలక పురోగతి సాధించింది. 

ఈ కేసుకు సంబంధించి సుమారు 150 మంది అనుమానితులను గుర్తించినట్లు సమాచారం. వీరిలో దాదాపు 25 మందిపై కఠిన చర్యలు తీసుకునే అవకాశం ఉందని తెలుస్తోంది.

దర్యాప్తులో భాగంగా ప్రధాన నిందితులుగా భావిస్తున్న లవ్ కుష్ మిశ్రా, అవనీష్, అనుకల్ప్ మిశ్రా, కరుణే, రామ్ శంకర్ అలియాస్ తిన్ను యాదవ్‌లను విచారించిన అధికారులు, వారి నుంచి లభించిన సమాచారం ఆధారంగా సుమారు రూ.2 కోట్ల నగదును స్వాధీనం చేసుకున్నారు. 

జూన్ 13న తిన్ను యాదవ్ నివాసంలో సోదాలు నిర్వహించిన SIT అధికారులు కొంత బంగారాన్ని కూడా స్వాధీనం చేసుకున్నట్లు వెల్లడించారు.

మరోవైపు, రామ మందిరానికి ఒక మహిళా భక్తురాలు తన ఆభరణాలను విరాళంగా సమర్పించిన ఘటనకు సంబంధించిన అంశాన్ని కూడా దర్యాప్తు అధికారులు పరిశీలిస్తున్నారు. 

ఆలయానికి వచ్చిన నగదు, బంగారం, ఇతర విలువైన వస్తువుల నిర్వహణలో జరిగినట్లు భావిస్తున్న అక్రమాలపై సమగ్ర విచారణ కొనసాగుతోంది.

ఈ వ్యవహారం జూన్ 7న వెలుగులోకి వచ్చింది. రామ మందిరంలో రూ.5 కోట్ల నుంచి రూ.7.5 కోట్ల వరకు విరాళాల నిధులు మాయమైనట్లు ఉత్తరప్రదేశ్ మాజీ మంత్రి పవన్ పాండే ఆరోపణలు చేశారు. 

ఈ ఆరోపణలు రాజకీయంగా చర్చనీయాంశంగా మారడంతో ఉత్తరప్రదేశ్ ప్రభుత్వం ప్రత్యేక దర్యాప్తు బృందాన్ని ఏర్పాటు చేసి విచారణకు ఆదేశించింది.

ప్రస్తుతం SIT అధికారులు సేకరించిన ఆధారాల ఆధారంగా మరికొంత మందిని ప్రశ్నించే అవకాశముందని, త్వరలోనే పూర్తి నివేదికను ప్రభుత్వానికి సమర్పించే అవకాశం ఉన్నట్లు సంకేతాలు అందుతున్నాయి.

#Sidhumaroju