ఎన్నికల వేళ అలర్ట్.. అవాంఛనీయ ఘటనలకు పాల్పడితే చర్యలు తప్పవు!
కాశీబుగ్గ: జెడ్పీటీసీ, ఎంపీటీసీ ఎన్నికల నేపథ్యంలో కాశీబుగ్గ సబ్‌డివిజన్ పరిధిలోని ఓటర్లకు సబ్‌డివిజన్ పోలీస్ అధికారి (ఎస్‌డీపీఓ) పలు కీలక సూచనలు జారీ చేశారు. ప్రతి ఓటరు స్వేచ్ఛగా, నిర్భయంగా తమ ఓటు హక్కును వినియోగించుకునేలా పోలీస్ శాఖ తరఫున కట్టుదిట్టమైన భద్రతా ఏర్పాట్లు చేసినట్లు తెలిపారు.
ఎన్నికల సమయంలో శాంతిభద్రతలకు విఘాతం కలిగించే చర్యలకు పాల్పడే వారిపై చట్టప్రకారం కఠిన చర్యలు తీసుకుంటామని హెచ్చరించారు. ఓటు వేసేందుకు పోలింగ్ కేంద్రాలకు వచ్చే ఓటర్లు సెల్‌ఫోన్లను వెంట తీసుకెళ్లి పోలింగ్ బూత్‌లోకి ప్రవేశించరాదని స్పష్టం చేశారు.
ఎన్నికల ప్రక్రియ ప్రశాంతంగా, పారదర్శకంగా సాగేందుకు ప్రజలందరూ పోలీస్ శాఖకు సహకరించాలని ఎస్‌డీపీఓ విజ్ఞప్తి చేశారు. ఎలాంటి అవాంఛనీయ సంఘటనలకు తావులేకుండా ఎన్నికలు సజావుగా జరిగేలా ప్రతి ఒక్కరూ బాధ్యతగా వ్యవహరించాలని కోరారు.
