ఆంధ్రప్రదేశ్ హోం శాఖ మంత్రి వంగలపూడి అనిత పరిషత్ ఎన్నికల్లో తన ఓటు హక్కును వినియోగించుకున్నారు. అనకాపల్లి జిల్లా నక్కపల్లిలోని ఒక పోలింగ్ కేంద్రంలో ఆమె ఓటు వేశారు. మంత్రిగా ఎలాంటి ప్రత్యేక ఏర్పాట్లు లేకుండా, ఒక సామాన్య పౌరురాలిగా తన కుటుంబసభ్యులతో కలిసి క్యూలైన్‌లో నిలబడటం అందరి దృష్టిని ఆకర్షించింది. తన వంతు వచ్చేవరకు అందరితో పాటు వేచి ఉండి ఆమె ఓటు వేశారు. పాయకరావుపేట నియోజకవర్గానికి ఆమె ఎమ్మెల్యేగా ప్రాతినిధ్యం వహిస్తుండగా, నక్కపల్లి మండలం ఆ నియోజకవర్గం పరిధిలోకే వస్తుంది.

ఓటు వేసిన అనంతరం మంత్రి అనిత మీడియాతో మాట్లాడారు. "ప్రజాస్వామ్యంలో ఓటు చాలా కీలకం. ప్రతిఒక్కరూ ఓటు హక్కును వినియోగించుకోవాలి" అని ఆమె ప్రజలకు పిలుపునిచ్చారు. ప్రజాస్వామ్య ప్రక్రియలో పాల్గొనడం ప్రతి పౌరుడి బాధ్యత అని గుర్తుచేశారు.